இன்னம்பூரான்
அண்டை நாடாகிய சைனாவை பற்றி நமக்கு தெரிந்தது குறைவு. பல காரணங்கள். நாம் குலாவினோம். அவர்கள் கடாசினார்கள். அவர்களின் வரலாறு, சமுதாயம், ராஜ்யபாரம், கலாச்சாரம், சிந்தனைக்களம் எல்லாமே உயர்ந்த படி நிலையில் பழமையானது; அதில் ஒரு தனித்தன்மை. மதில்கள் பலவற்றால் பாகப்பிரிவினை செய்யப்பட்ட சிற்றரசுகளை, போர்கள் பல புரிந்த பின்னர், ஒன்றாகத் திரட்டி, மாபெரும் மதில் ஒன்று அமைத்து, ‘சைனாவை’ தன் பெயரில் படைத்தவன் சின் ஷியாங்க் (Qin Shihuang) ~ 221 BC. பிறகு, பல வம்சாவளிகள்; உதாரணமாக மிங் வம்சாவளி (1368 ~1644). கடைசி மன்னன் முடி இழந்த பின் தோட்டக்காரன் ஆனார். சன் யாட் சன் குடியரசு நிறுவினார். சியாங்கே-ஷேக் காலத்தில் யதேச்சதிகாரம். கம்யூனிஸம் தலை தூக்க, அவர் தலை தெறிக்க க்வோமிண்டங்க் (தைவான்) தீவை நோக்கி ஓடினார். தற்காலம் அதுவும், ஹாங்காங்க் பிரிட்டீஷ் காலனியும், அப்பாவி திபெத்தும், பெரிய சைனா கையில். போதாக்குறைக்கு, சைனா இந்தியாவை கிள்ளாத நாள் கிடையாது. இந்தோ-சைனா பாயி பாயி! இன்றைய சைனா முதலாளித்துவத்தை போற்றுகிறது; போர்வை கம்யூனிசம்!
இந்த பீடிகை சின் ஷியாங்க்கின் (Qin Shihuang) மறு அவதாரம் போன்ற கொடுங்கோலன் சேர்மன் மா ~சே துங்க் (Mao Zedong) ஆகஸ்ட் 13, 1966 அன்று காண்பித்த பாய்ச்சல் ("new leap forward")/ஆடுபுலியாட்டம் (purge)/புரட்டி, புரட்டி அடிக்கும் மஹோத்ஸவம் (‘hard line’)/ “கலாச்சார புரட்சி” (‘Cultural Revolution’) ~ பத்து வருட அதகளம் எல்லாம் பற்றி குறிப்பால் உணர்த்த.
1958லேயே வேளாண்மை புரட்சிக்கும், தொழிற்புரட்சிக்கும் அறை கூவினார்,சேர்மன் மா. சிறு பண்ணைகளை ஒழித்து மாபெரும் விவசாய குடித்தனங்கள், உற்பத்தியை பெருக்கும்; தொழிலுக்கு ஆட்கள் கிடைப்பர் என்று ஆணையிட்டார். நடந்தது வேறு. வேளாண்மை படுத்து, பஞ்சம் தலை விரித்தாடியது; தரம் குறைந்த தொழில் உற்பத்தி. போலிப்பொருட்கள் வரத்தொடங்கின. இதையெல்லாம் உதறிவிடுவேன் பேர்வழி என்று, வந்தது தான் 1966வது வருட பாய்ச்சல். அதற்கேற்ற தருணம் கிட்டியது என்று ஜயபேரிகை முழக்கம்; கட்சி மையம் ஒத்து; ஊடகங்கள், ‘தகதிமிதா’ என்று தாளம்; ‘யாருடா உதட்டசைக்கிறது? என்றார், பெரிய ஐயா. அடி, கொல்லு என்று அருளினார். பீகிங்க் மேயர் பென் செங்க் டிஸ்மிஸ். சற்றே மிதவாதி ( அதான் பஞ்ச்ஷீல் அபகீர்த்தி சூ.என்.லாய்க்கு (Chou En-lai) எச்சரிக்கை.) சோவியத் ரஷ்யாவிலும் சரி, கம்யூனிஸ்ட் சைனாவிலும் சரி, எச்சரிக்கைகளை விட சங்கேதங்கள் பயங்கரமானவை;எதிர்பாராத அபாயங்கள் அன்றாட காட்சி. எனவே, தன்னையே அடித்துக்கொள்ள சொல்லுவார்கள். அது கரணம். தப்பினால், மரணம்.
இந்த “கலாச்சார புரட்சி” பழி வாங்கியது, பலி எடுத்துக்கொண்டது. பெரிய ஐயா திரட்டிய ‘சிவப்பு காவலர்கள்’ (Red Guards) தான் பிற்கால டாலிபான்களுக்கு முன்னோடிகள் போல. மாணவர் கும்பல் கும்பலாக, மூளைச்சலவை செய்யப்பட்டனர். அவர்களுக்கு இடப்பட்ட ஆணை ~ பண்டைய பழக்க/வழக்கங்கள்/ சிந்தனை/ கலாச்சாரம்/ பண்பு ஆகியவற்றை அறவே ஒழித்து விடு. அவர்களுக்கு பேருதவியாக, கல்லூரிகள் மூடப்பட்டன. ஆசிரிய பெருமக்களும், பெற்றோரும் தாக்கப்பட்டனர். ‘சிவப்பு காவலர்களுக்கு’ வேதபாடம்::சேர்மன் மா ~சே துங்க் அவர்களின் சிந்தனைகள்’ 35 மிலியன் பிரிதிகள். உதட்டளவு வைரிகளைக்கூட பூண்டோடு அழித்து விட்டார். மாட்டிக்கொண்டவர்கள் 3 மிலியன். ஆயிரக்கணக்கணவானர்கள் சிறையில் சித்திரவதை பட்டு செத்தனர். பத்து வருடம் நடந்தது இந்த அராஜகம், 1976ல் மா ~சே துங்க் சாகும் வரை. அவருடைய உடலை பதப்படுத்தி (அழுகிண்டு. வரதாம்!) ஒரு மாபெரும் நினைவாலயத்தில் பார்வைக்கு வைத்தனர்.
இந்த கட்டுரை ஒரு சிறிய அறிமுகமே. ஆகஸ்ட் 13, 1966 தேதிய நிகழ்வு ஒன்றை மையமாக வைத்து எழுதப்பட்டது. சைனாவை பற்றி விரிவாக அறிய உசாத்துணைகள் கொடுக்கப்பட்டுள்ளன. அவை கூட ஒரு சிறு துளி.
http://www.stampmagazine.co.uk/sites/12/images/article_images_month/2011-03/new%20china%201968%20great%20victory.jpgஇந்த தபால்தலை வெளிவரவில்லை, ஜப்பான் அரசு ஆக்ஷேபித்ததால். சந்தையில் இதன் விலை 11/2 கோடி ரூபாய்!
உசாத்துணை:
http://news.bbc.co.uk/onthisday/hi/dates/stories/august/13/newsid_4537000/4537605.stmhttp://chinese.ucdavis.edu/faculty/article/xchen_taiping_rebellion_new.pdfhttp://researcharchive.vuw.ac.nz/bitstream/handle/10063/1332/thesis.pdf?sequence=2‘Telling the Truth About People’s China’. By Alistair Shaw
http://www.jstor.org/pss/2009736
Evans. P. (2005): Fried Eggs with Chopssticks: Around china by Any means Possible: London: Bantam
--பவள சங்கரி திருநாவுக்கரசு. 13:41, 16 ஆகஸ்ட் 2011 (UTC)