அன்றொருநாள்: மார்ச் 12

இன்னம்பூரான் 

ஆனை விலை உப்பு!

‘மார்ச் 12ம் தேதி இவ்விழையை தொடருவதாக உத்தேசம். பார்க்கலாம்’. என்று அன்றொருநாள்: மார்ச் 2:ஓலை வெடி! வெடித்தது. ஆனால், சத்தம் அநேக மின் தமிழர்கள் காதில் விழவில்லை போலும். இன்று மஹாத்மா காந்தி தன் கைத்தடியை தரையில் தட்டி, சத்தம் எழுப்பி, உம்மையெல்லாம் கூப்பிடுகிறார். வருக. என்னது இது? காந்தி, காந்தி என்று உயிரை விடுகிறீர்கள்? ராஹுல் காந்தி கூட உத்தரப்பிரதேசத்தில் மண்ணை கவ்வினாரே என்றா கேட்கிறீர்கள்? அப்படியில்லை, அன்பரே! தற்கால தலைமுறைக்கு ராஹுலை தெரிந்த அளவு மோஹனை தெரியாது அல்லவா!

மஹாத்மா காந்தியை ‘வந்து வந்தீண்டி’ புவியெங்கும் அவருடைய புகழை நறுமணமாக எடுத்துச்சென்ற மூத்த இதழாளர்களில் இருவர்: கிங்க்ஸ்லி மார்ட்டின், லூயி ஃபிஷர். இருவரையும் பார்த்து அளவளாவும் தருணம் எனக்கு கிட்டியது. கிங்க்ஸ்லி மார்ட்டின் ஜனவரி 30, 1948க்கு சில நாட்கள் முன்னால், காந்திஜியை கடைசியாக பேட்டி கண்டார். உருக்கமான நிகழ்வு. அது பற்றி எழுத எப்போது தருணம் கிட்டுமோ? நான் லூயி ஃபிஷரை பேட்டி கண்ட விவரம், என்னை கேலி செய்ய உதவும். புள்ளிமான் போல் துள்ளி என்னை எள்ளல் செய்ய விழைவோருக்கு, அது ஒரு வரப்பிரசாதம். கல்லூரி மாணவன். பட்டணம் புதிசு, பட்டிக்காட்டானுக்கு. நானோ இன்று போல, அன்றும் வெள்ளந்தி. காலணி கிடையாது, நாலுமுழ வேட்டி, அரைக்கை சட்டை. இஸ்திரி காணாத உடுப்பு. கன்னிமேரா ஹோட்டல் போய் சேர்ந்தேன். டவாலி உள்ளே விடமாட்டேன் என்றான். நான் ஒரு லுக்கு விட்டேன், பாருங்கள்! அதன் தாத்பர்யம்: ‘ வாயிற்காப்போனே! அடிமை வாயிற்காப்போனே! இது பிரிட்டீஷ்க்காரன் ஓட்டலா இருக்கலாம். நாடு நமதே! லூயி ஃபிஷர் எனக்கு டைம் கொடுத்திருக்காரு! சாக்கிரதை.’ உடுப்பு விஷயங்களை கேர் செய்யாமல் பண்புடன் ஒரு மணி நேரம் பேட்டி அளித்தார். அதை பயன்படுத்திக்கொள்ள தெரியவில்லை. காந்தி மஹானின் வாழ்க்கை வரலாற்றை எழுதிய அவர், ‘மஹாத்மா எல்லாரும் செய்யக்கூடியதைத் தான் செய்தார்; மற்றவர்கள் செய்வதில்லை; அவர் செய்து காட்டினார். அவ்வளவு தான்’ என்றார். அது என்ன?

மார்ச் 12, 1930: 78 ஆண் ஸத்யாக்ரஹிகளுடன் 240 மைல் தொலைவில் உள்ள தண்டி என்ற கடற்கரை ஊருக்கு, கால் நடையாக, ஸபர்மதியிலிருந்து அண்ணல் காந்தி புறப்பாடு. அந்த யாத்திரை 23 நாட்கள் பிடித்தது. வழி நெடுகிலும், ஒவ்வொரு ஊரிலும், திரள் திரளாக, மக்கள் இந்த அமைதிப்படையை பார்த்து வியந்தனர். அரசியல்வாதிகள் மேடை போட்டு பிரசாரம் செய்வார்கள். கர்மவீரர் காந்திஜி நடை நடந்து, கோஷ்டி சேர்த்தார். பார்த்தவர்களிடம், ‘வசதிப்படி உப்பு காய்ச்சு’ என்றார். விதேசி துணி பகிஷ்காரமும், கதர் வியாபாரமும் கொசுறு பணிகள். காய்ச்சிய உப்பை வியாபாரம் செய். அப்போது தான் சட்டவிரோதம் முழுமை அடையும் என்றார். அவர் எடுத்த ஒரு சிம்டா உப்பு ரூபாய் 1600க்கு விற்றது. காந்திக்கணக்குக்கு நல்வரவு, திவாகர்.

ஓவர் டு லூயி ஃபிஷர்: “...குனிந்து ஒரு கைப்பிடி உவர்மண்னை எடுத்தார், காந்திஜி... உடனடி ஆதாயம் ஒன்றும் தென்படவில்லையென்றாலும், பல சாதனைகள் நிகழ்ந்தன...உலகம் இந்தியாவை திரும்பிப் பார்த்தது, மரியாதையுடன். இந்த போரின் தார்மீகம் அமெரிக்காவின் கவனத்தை சுண்டி இழுத்தது. 1930ம் வருடம் டைம் இதழின் ‘இவ்வருட மாமனிதன்’ மஹாத்மா காந்தி. அண்ணலின் தீர்க்க தரிசனத்தின் நன்கொடை, அரசியலில் பெண்ணினம் கலந்து கொண்டது. இணைத்திருக்கும் படத்தில் இருக்கும் மெஜாரிட்டியை நோக்குக. (மார்ச் 2 அன்று, இதை சுட்டியும், காந்திஜிக்கு கதர் மாலை அணிவித்த கவிக்குயில் சரோஜினி நாயுடுவின் ஃபோட்டோ பதிவானது.)

உப்பு பொறுக்கிய தினம் ஏப்ரல் 6. அன்று, இந்த இழையை தொடரலாமா?

இன்னம்பூரான்

12 03 2012

http://www.english.emory.edu/Bahri/TheLeaderLeads.gif

உசாத்துணை:

http://www.lifepositive.com/spirit/masters/mahatma-gandhi/dandi-march.asp

--பவள சங்கரி திருநாவுக்கரசு. 02:57, 17 மார்ச் 2012 (UTC)