கோவிலூர் ஆதீனப் பதிவுகள் பதிவு 33

கோவிலூர் மடாலயம்

மேற்கு மாம்பலம், சென்னை.

தமிழகத்தின் தலைநகரமான சென்னை நகரத்தில் நகரின் மையப்பகுதியான மாம்பலத்தில் பேருந்து நிலையத்திற்கு மிக அருகாமையில் அமைந்துள்ளது நம் கோவிலூர் மடாலயத்தின் சென்னைக்கிளை மடம்.  இத்திருமடம் நம் குருமகாசந்நிதானம் சீர் வளர் சீர் நாச்சியப்ப ஞான தேசிக சுவாமிகளின் பெரும் பொருள் உதவியுடன் கட்டப்பட்டது.  குளிர்சாதனத்துடன் கூடிய அரங்கம் ஒன்றும் உணவுக்கூடம் ஒன்றும் அலுவலக வளாகம் ஒன்றும் பத்து விருந்தினர் அறைகளும் கூடிய வசதிகள் நிறைந்த திருமடம்.

இத்திரு மடத்தை 21--02--1999 அன்று ஶ்ரீமத் காஞ்சி சங்கராச்சாரியார் ஶ்ரீமத் ஜெயேந்திர சரஸ்வதி அவர்களும் இளையவர் விஜயேந்திர சரஸ்வதி அவர்களும் திறந்து வைத்தனர்.

இத்திருமடத்தில் பல்வேறு விதமான கலை மற்றும் கல்விக்கூடங்களும் சேவைகளும் நடைபெற்று வருகின்றன.  திருமுறை வகுப்புகள், இசை நடன வகுப்புகள், யோகா வகுப்புகள், ஓவியம் மற்றும் தஞ்சாவூர் ஓவிய வகுப்புகள் முறையாக நடைபெற்று வருகின்றன.  நகரத்தார் திருமண சேவை மையமும் இங்கு செயல்பட்டு வருகின்றது.

இங்கு பல்துறைக்கலை நிகழ்ச்சிகளும் சமய இலக்கியக் கூடங்களும் தொடர்ந்து நடைபெற்று வருகின்றன.

இம்மடத்தால் இப்பகுதி மக்களும் மாணவர்களும் மிகுந்த பயன் அடைந்து வருகிறார்கள்.

***************************************************************************************

கோவிலூர் வேதாந்த மடம் -- ரிஷிகேஷ்

இமயமலையின் அடிவாரத்தில் ஆதிகாலம் தொட்டு, ஞானிகளும் ரிஷிகளும் தவம் செய்து புகழ் பெற்ற ஞான பூமியாக விளங்கும் ரிஷிகேசத்தில் நம் குரு மகா சந்நிதானம் அவர்களின் அருள் உள்ளத்தாலும் பொருள் உதவியாலும் ஒரு அழகான அமைதியான ஆஸ்ரமம், "கோவிலூர் வேதாந்த மடம்" என்ற பெயரில் 2000 ஆம் ஆண்டு ஏப்ரல் மாதம் 24 ஆம் தேதி அன்று பூஜ்ய ஶ்ரீ தயானந்த சரஸ்வதி அவர்களால் தொடங்கி வைக்கப் பெற்றது.

ஆரம்பத்தில் ஏறக்குறைய முக்கால் ஏக்கர் நிலத்தில் 24 அறைகள், உணவுக்கூடம், சொற்பொழிவுக்கூடம், பிரார்த்தனை மண்டபம் ஆகியவற்றுடன் ஆரம்பிக்கப்பட்டது.  தற்போது 75 அறைகள், அன்னதான மண்டபம், நூலகம், பிரார்த்தனை மண்டபம், அலுவலகம், மான்டிசோரிப்பள்ளி, ஆயுர்வேத, ஹோமியோபதி மருத்துவ சாலை, பசுமடம், என எல்லா வசதிகளையும் கொண்டு திகழ்கிறது.

இத்திருமடத்தின் சூழல் மிக அற்புதமானது.  வெயிலின் கொடுமை எக்காலத்திலும் தெரியா வண்ணம் மரம், செடி, கொடிகள் நிறைந்து வனம் போல் இதமான சூழல்.  இங்கு படர்ந்திருக்கும் பழைமையான ஆலமரமும் அதன் கீழ் அமர்ந்து அருள் பாலிக்கும் அருள் மிகு கற்பகப் பிள்ளையாரும் கண்கொள்ளாக்காட்சி.  அருள் பொழியும் கற்பக மூர்த்தி அருளால் இத்திருமடம் ஏழு ஆண்டுகளில் மிகப் பெரிய வளர்ச்சி கண்டுள்ளது.

இங்குள்ள சூழல் தவம் செய்வதற்கும் அமைதியாகக் கற்பதற்கும் ஏற்ற சூழல்.  கவலைகளை, பதட்டங்களை அறவே அகற்றக் கூடிய அற்புதமான அமைதியான திருத்தலம். இங்கு வேதம், சம்ஸ்கிருதம், வேதாந்தம் ஆகியவை கற்பிக்கப்படுகின்றன.  மழலையர்க்கான இயல்பான செயல்முறைக் கல்வியான மாண்டிசோரிக்கல்வி 3 வயது முதல் 6 வயது வரைக்கான குழந்தைகட்காக மிகக் குறைந்த கட்டணத்துடன் நடந்து வருகிறது.  இதில் ஏறக்குறைய 60 குழந்தைகள் படிக்கின்றனர்.  இலவச மருத்துவமனை மாலை நேரங்களில் நடைபெற்று வருகின்றது.  அவ்வப்போது யோகா வகுப்புகளும் சிறுவர்கட்கான முகாம்களும் நடைபெற்று வருகின்றன.

சாதுக்களுக்கு அன்னம் பாலிக்கப்படுகின்றது.

யாத்திரிகர்கள் தங்குவதற்கும் உண்பதற்கும் நிறைந்த வசதிகள் செய்யப்பட்டுள்ளன.  ஏராளமான தென்னக யாத்திரிகர்கள் வந்து தங்கிப் பயன்பெறுகிறார்கள்.  இங்குள்ள வசதியும் விருந்தோம்பலும் மேலும் மேலும் பெரும் யாத்திரிகர்கள் கூட்டத்தை ஈர்க்கின்றன.

பூஜ்ய சுவாமி தயானந்த சரஸ்வதி, ஶ்ரீஶ்ரீஶ்ரீ ரவிசங்கர் சுவாமிகள், பரமஹம்ச நித்தியானந்த கிரி சுவாமிகள் போன்ற ஞானிகளின் முகாம்களும் ஆண்டுதோறும் நடைபெற்று வருகின்றன.

அவ்வப்போது சாதுக்களுக்கும் குழந்தைகட்கும் அன்னதானம், (பண்டாரா) மிகச் சிறப்பாக நடைபெற்று வருகின்றன.

--Geetha Sambasivam (பேச்சு) 12:48, 4 ஜூலை 2014 (GMT)