இறைவனைக் காண்போம்! 48 நெருப்புக் கோழி!

இயற்கையின் எழிலில் இறைவனைக் காண்போம் (48) நெருப்புக் கோழி

 

உலகத்தில் உள்ள பறவைகளில் மிகப் பெரிய பறவை நெருப்புக் கோழி.  இதன் ஆங்கிலப் பெயர் “Ostrich”.  விஞ்ஞான ரீதியாய் இதற்கு அளிக்கப் பட்ட பெயர் “Strutheo camelus” என்பதாகும்.

Inline image 2

 

ஆணும் (கருப்பு) பெண்ணும் (பழுப்பு)

 

இந்தப் பறவை ஆப்பிரிக்கா கண்டத்துப் பறவை.  இன்னாட்களில் இப்பறவையை அதன் மாமிசத்திற்காகவும் சிறகுகளுக்காகவும் ஆஸ்திரேலியா, ந்யூசிலாந்து போன்ற நாடுகளில் பண்ணைகளில் வளர்க்கின்றனர்.

 

நெருப்புக் கோழியின் சிறகுகள் மேலை நாட்டு சீமாட்டிகளின் குல்லாயை அலங்கரித்திடும் ஒன்று.

 

Inline image 1

 

நெருப்புக் கோழி பெயருக்கு தான் பறவை.  இறக்கைகளும் உண்டு இதற்கு.  விரித்தால் சுமார் இரண்டு மீடர் நீளம் கொண்டவை அவை.  ஆனால் பறக்க முடியாத பறவை இது. 

 

இறக்கைகள் இல்லையே என்பதற்காக கவலையே பட வேண்டாம் இப் பறவை.  காரணம் ஓட ஆரம்பித்தால் சுமார் மணிக்கு 96 கிலோ மீடர் (மணிக்கு 60 மைல்) வேகத்தில் ஓடக் கூடியது இது.  அவற்றை உண்ண வரும் சிங்கம், ஓனாய்கள் போன்றவற்றிடம் இருந்து எளிதாய் ஓடியே தப்பித்து விடும்.

 

நெருப்புக் கோழி ஓடுவதைப் பார்க்க வேண்டுமா?  இந்தச் சுட்டியில் இணையத்தில் காணவும்:

 http://upload.wikimedia.org/wikipedia/commons/thumb/6/62/Ostrich_running.ogv/Ostrich_running.ogv.480p.ogv

 

நெருப்புக் கோழிக்கு இறக்கையின் உபயோகம் இனப் புணர்ச்சிக் காலத்தின் போது துணையினை ஈர்க்கத்தான்.  அவற்றைப் பல விதமாக ஆட்டி தன் துணையின் கவனத்தை ஈர்த்திட முயலும் இப் பறவை.

 

நெருப்புக் கோழி என்ற உடன் நெருப்பைத் தின்னுமோ இது என்று நினைத்து விடாதீர்கள்.  நெருப்பைத் தின்னாது.  ஆனால் சிறு சிறு கற்களை, தனது உணவான தானியங்கள், விதைகள், சிறு செடிகள், புல், பழங்கள், வெட்டுக்கிளி போன்றவற்றுடன் சேர்த்து உண்ணும்.  எதற்கு தெரியுமா? குடலில் உண்ட உணவினை அறைத்திடத்தான்!

 

நெருப்புக் கோழி அதனைத் துரத்தி வரும் எதிரிகளிடம் இருந்து தன்னை மறைத்துக் கொள்வதற்காக மண்ணுக்குள்ளோ, அல்லது சிறு புதருக்குள்ளோ தன் தலையை சொருகிக் கொண்டு தன் உடலே மறைந்து விட்டிருக்கும் என்று நினைத்துக் கொள்ளும் என்பதும், நெருப்புக் கோழி கண்ணை மூடிக் கொண்டால் உலகமே இருண்டு விட்டதாக நினைத்துக் கொள்ளும் என்பதும் தவறான எண்ணங்கள்.

 

நெருப்புக் கோழியின் கால்கள் மிகவும் பலம் பொருந்தியவை.  ஒரே உதையில் ஒரு மனிதனை தரையில் சாய்த்திடும் பலம் கொண்டது அது.

 

பறவைகளுக்கு சாதாரணமாக கால்களில் நான்கு விரல்கள் இருக்கும்.  ஆனால் நெருப்புக் கோழிக்கு ஒரு காலுக்கு இரண்டு விரல்கள் தான் உண்டு.  உள் விரல் சற்று பருத்தது நீண்டு பெரிதாகவும் வெளி விரல் சிறிதாகவும் இருக்கும்.  உள் பக்க விரலின் நகம் ஆடு மாடு இவற்றின் குளம்பு போன்று தோன்றும்.

Inline image 3

நெருப்புக் கோழியின் கால் விரல்கள்

 

நெருப்புக் கோழி பல பட்டியல்களில் முதல் இடம் வகித்திடும் ஒரு பறவை.

 

கனம்: 140 – 290 பவுண்டு (63.5 – 131.5 கிலோ கிராம்) எடை கொண்ட பறவை.  உலகிலேயே மிக கனமான பறவை இது.

உயரம்: 6 முதல் 9 அடி உயரம் (1.8 – 2.7 மீடர்) உயரம் கொண்ட பறவை.  உயரத்திலும் முதலிடம் இந்தப் பறவைக்குதான்.

உலகிலேயே மிக கனமான முட்டை இடும் பறவை நெருப்புக் கோழி.  முட்டையின் எடை சுமார் 1.400 கிலோ (3.1 பவுண்டு). (25 கோழி முட்டைகளுக்கு சமம் இது.)

 

இப்படி பல சிறப்புகளைத் தன்னுள் கொண்ட பறவை, இயற்கை நமக்களித்திடும் ஒரு இன்பக் காட்சி தானே?