"தீபாவளிப்பலகாரங்கள்- இனிப்பு வகைகள்" பக்கத்தின் திருத்தங்களுக்கிடையேயான வேறுபாடுமரபு விக்கி இருந்து
20:28, 23 அக்டோபர் 2011 இல் நிலவும் திருத்தம்உக்காரை: இதைக் கடலைப்பருப்பு, பாசிப்பருப்பு, போன்றவற்றில் செய்யலாம். இரண்டையும் கலந்தும் செய்யலாம். இருவிதமான செய்முறைகளும் உள்ளன. தேவையான பொருட்கள்: பாசிப்பருப்பு ஒரு கிண்ணம், கடலைப்பருப்பு ஒரு கிண்ணம், பாகு வெல்லம் அரை கிலோ, தேங்காய் நன்கு முற்றியது ஒன்று. உடைத்துக் கீறிக்கொள்ளவும், முந்திரிப்பருப்பு ஐம்பது கிராம், ஏலப்பொடி, நெய் ஐம்பது முதல் நூறு கிராம். ஒரு சிட்டிகை உப்பு. பாசிப்பருப்பு, கடலைப்பருப்பை வெறும் வாணலில் வறுத்துக்கொண்டு இரண்டு மணி நேரம் ஊற வைக்கவும். பின்னர் மிக்சியில் போட்டு ஒரு சிட்டிகை உப்புச் சேர்த்து அரைக்கவும். ஒரு வாணலியில் நெய்யில் பாதி அளவு ஊற்றிக்கொண்டு அரைத்த மாவைப் போட்டு நன்கு வேகும்வரை கிளறவும். நன்கு மூடி வைத்துக்கிளறினால் நன்கு வெந்து கொள்வதோடு உதிர் உதிராகவும் வரும். நன்கு உதிராக வந்ததும் அதை எடுத்து ஒரு தாம்பாளத்தில் கொட்டிக் கொள்ளவும். இது ஒரு முறை எனில் இன்னொரு முறையில் அரைத்த மாவை இட்லித்தட்டில் போட்டு வேக வைத்து நன்கு உதிர்த்துக்கொள்ள வேண்டும். ரொம்பவே ஆசாரம் பார்ப்பவர்கள் இட்லித்தட்டில் வேக வைத்தால் சாப்பிடுவது இல்லை என்பதால் முதலில் சொன்னமாதிரி நெய் விட்டும் உதிர்க்கலாம். அவரவர் விருப்பம்போல் மாவை உதிர்த்துக்கொண்டதும், உருளி அல்லது கடாயில் வெல்லத்தைக் கரைத்து அழுக்கு நீக்கி விட்டுக் கொதிக்க விடவும். பாகு நல்ல முற்றிய பதமாக உருட்டினால் உருட்ட வரவேண்டும். தட்டில் போட்டால் "டங்" என்று சப்தம் வரவேண்டும். அந்தப் பதத்தில் வந்ததும் தாம்பாளத்தில் கொட்டி இருக்கும் மாவில் கொஞ்சம் கொஞ்சமாக ஊற்றிக் கலக்கவும். மாவோடு பாகு நன்கு கலந்ததும், மிச்சம் உள்ள நெய்யை ஊற்றி அதில் முந்திரிப்பருப்பு, தேங்காய்க் கீறல்களைப் போட்டு வறுத்துச் சேர்க்கவும். ஏலப்பொடி சேர்க்கவும். ஒரு பாத்திரத்தில் எடுத்து வைக்கவும். முதல் நாளை விட மறுநாள் மென்மை அதிகரித்து இனிப்பு நன்கு கலந்து சுவையாக இருக்கும். இது பெரும்பாலான தென்மாவட்டங்களின் மக்கள் தீபாவளிக்குக் கட்டாயமாய்ச் செய்யும் இனிப்புப் பலகாரங்களில் முதன்மையானது.
--Geetha Sambasivam 20:28, 23 அக்டோபர் 2011 (UTC)<span id="fck_dom_range_temp_1319401709562_295" /> |